Шүлэг: Би ЭХНЭРТЭЙ

2009 оны үед ажлын файл дотроо хуулж байсан зүйлсийг оллоо...

уран яруу үг хүнийг баясгах нь таатай... 

Оросын их яруу найрагч Николай Гумилев:

“Ээтэн гутлын хоншоороор дэлхийн бөмбөрцгийг өшигчин
Ээрэм талын хүлгээр, эцсийн далайг зорьсон
Миний өвөг дээдэс Хөх Монголын нүүдэлчин
Мэлмий алдрах говийн цалин цагаан туургатан”

Цантсан цонхон дээр хуруугаараа зун гэж сийллээ
Цаана нь цас хаялж байна.
Цамцны минь захан дээр чи уруулаараа дурлал гэж тамгаллаа
Цаана нь шаналал дуншиж байна.
Цаг хугацааны манан дунд сэтгэлээрээ мөнхийн арц асаалаа
Зуурдхан үнэртэж байна.
Цагаан цаасан дээр үзгээрээ үнэн гэж бичлээ
Худлаа сонсогдож байна.

Хорин тавтай сэтгэл дүрэлзтэл асдаг гэсэн, энэ үү?
Үнс нурам асууж байна.
Хорвоогийн амьдрал дандаа жаргалаар эхэлдэг гэсэн, үнэн үү?
Зовлон зүдүүр итгэхгүй байна.
Арвайн буудай зүүн дээр уярах гэж тогтсон юм уу?
Гуних гэж тогтсон юм уу?
Амьдрал тавилан гээч надад зол болж ирсэн юм уу?
Хохь болж ирсэн юм уу?

Тэнгэрийн уудмаас нүдээрээ эрх чөлөөг хайлаа
Газраар дүүрэн гав гинж байна.
Тэвчээрийн чавхдасаа нулимсанд дүрж харууслын шүлэг зохиолоо
Хүмүүс алга ташиж байна.
Яг мянган жилийн өмнөх шиг өвс хагдарна
Гэвч ахиад л ургасаар байна.
Яруу найрагчийн зүрх одоо үхлийг л хүлээнэ
Гэвч амьдралаар шагнуулж байна.


Хүндэтгэсэн Батхүүгийн Батзаяа 2009.01.08

Яруу найраг өөрийн замаар явж, хүрэх ёстой хүмүүстээ хүрдэг гэнэм.
Доорх шүлгийг Л.Лханаран гэдэг ах англи хэлнээ дуун хөрвүүлжээ.
Заяагийн шүлгүүдээс англи хэл рүү орчуулагдсан анхны шүлгийн эхний уншигчид та бид боллоо.

I'm married

Two words for a heart lured my eyes
I’m married
See my engagement sworn for love
Ring locked
We share one fate through pain
Still happy
God spared me one heart to love
Yet taken

***

Би эхнэртэй

Харц чулуудсан зүрхэнд хэлэх хоёрхой үгтэй:
Би эхнэртэй.
Харсаар байтал ядам хуруу минь хайрын тангаргатай:
Бэлзэг түгжээтэй.
Хос хосоороо зовлон туулдаг нэг л тавилантай:
Тэгэвч жаргалтай.
Хорвоод би хүнийг хайрладаг ганцхан зүрхтэй:
Тэр нь эзэнтэй.

Батхүүгийн Батзаяа