Taipei ONE-0-ONE

   Тайпейн бахархалын тухай эндээс уншаарай... 

Хятадын нэг хэсэг Тайванийн нийслэл Тайбэйгийн   509,2 метрийн өндөртэй, 101 давхар өндөр барилгаар иргэд нь бахархдаг. Цамхгийн барилгын ажил  1999 онд эхэлж 2003 оны 11 дүгээр сарын 17-нд ашиглалтад оржээ. Энэхүү хүний гараар бүтээгдсэн гайхамшгийг 1.7 тэрбум ам.долларын өртгөөр барьсан юм. Цамхаг хөх-ногоон  өнгийн шилээр хоёр давхар бүрхэгдсэн нь ажилтнуудыг халуунаас гадна туяанаас хамгаалах хамгаалалт болдог. Хосгүй барилгын гүйцэтгэгчээр KTRT Joint Venture, Samsung Engineering & Construction

компани ажиллажээ.

Барилгын 1-4 давхарт худалдааны төвүүд, 5-6 давхарт фитнес төв, 7-84 давхарт офис, 85-88 давхарт  зоогийн газар, баар, 89, 91, 101 дүгээр давхарт  иргэд, зочдод зориулсан талбай, 92-100 давхарт техникийн алба байрладаг.

   Шил, болд, хөнгөн цагаанаас бүтдэг барилгыг 80 метр  газрын гүн рүү орсон 380 бетон тулгуур тулдаг. Хар салхи, газар хөдлөлтийн хүчийг сааруулах 87-91 давхрын хооронд байдаг  660 тоннын савлагч “хариуцдаг”. Зөвхөн энэ савлагч дөрвөн сая ам.долларын өртөгтэй. Тус барилгыг барьсан инженерүүдийн ярьснаар энэ цамхаг хүчтэй савлагааг 2500 жил даах хүчин чадалтай. Барилгын явцад 2002 оны гуравдугаар сарын 31-нд Тайбэйд 6,8 баллын хүчтэй газар хөдлөлт болж нэг төрлийн шалгуур болсон бөгөөд хүчтэй газар хөдлөлтөөс хоёр кран   эвдэрч таван хүн амь үрэгдсэн ч цамхгийн барилгын ажил хэвийн үргэлжилж бат бөх гэдгээ нотолсон юм.

Цамхгийг Тайбэйгийн эдийн засгийн корпораци эзэмшдэг. Корпорацийг Чикаго дахь төвтэй Америкийн худалдааны корпораци удирддаг. Хосгүй барилга Тайбэйгийн төдийгүй Тайванийн гол бэлгэдэл болсоор байна. Төслийг 1997 онд хотын дарга Чэнь Шуйбянь эхлүүлж байв.

Тус цамхагтай холбоотой зарим сонирхолтой түүхээс:

2004 оны 12 дугаар сарын 25-нд “Хүн-аалз” хочит Ален Робер дөрвөн цаг авирч оройд нь гарчээ. Тэрбээр энэ ажлыг хоёр цагт хийхээр төлөвлөж байсан гэдэг.

2005 оны хоёрдугаар сарын 28-нд АНУ-ын ерөнхийлөгч Билл Клинтон тус цамхагт зочилж гарын үсгээ үлдээсэн.

2005 оны дөрөвдүгээр сарын 19-нд А.Эйнштейний харьцангуйн онолын дагуу E=mc² томъёогоор гэрэлтүүлэх болжээ.

2005 оны 11 дүгээр сарын 20-нд 91 давхар хүртэл  2046 шатаар өгсөх  тэмцээн зохион байгуулж эрэгтэйчүүдээс Австралийн  Пол Крейк 10 минут 29 секунд, эмэгтэйчүүдээс Австрийн Андреа Майр 12 минут 38 секундын амжилтаар тэргүүн байр эзэлж байв. Уралдаанд түрүүлэгч 200 мянган тайвань.доллар буюу 6600 орчим ам.долларын шагнал авдаг.

2006 оны аравдугаар сарын 20-нд хөхний хавдраар өвдсөн эмэгтэйчүүдтэй эв санааны нэгдэлтэй байгаагаа илэрхийлэн арван хоног ягаан тууз хэлбэртэй гэрэлтүүлэг асааж байв. Үүнийг “Эстэ Лодер” компани ивээн тэтгэж байлаа.

2007 оны 12 дугаар сард Австрийн Феликс Баумгартнер 90 давхраас шүхрээр үсэрчээ.

Тайбэй 101 Хятадын эртний философийг орчин үеийн технологи, материалтай уялдуулан хийсэн гайхамшиг юм. Өндөр антенн ертөнцийн дөрвөн зүг, дэлхийн тэнхлэгийг газар, тэнгэртэй холбох бэлгэдэлтэй. 

 Шинэ зуун эхэлж байгааг /тухайн үед/ бэлгэдэн 100+1 гэснээс гадна 101 нь Тайбэйгийн олон улсын код болдгийг ч тооцоолсон байна. Барилгыг найман хэсэгт хуваадаг бөгөөд хятадууд эртнээс наймын тоог хамгийн азтайд тооцдог. Цамхгийг солонгын долоон өнгөөр гариг бүрт  ээлжлэн гэрэлтүүлдэг уламжлалтай. Энэ нь ч мөн л газар тэнгэрийг холбодог солонгыг бэлгэддэг.

Тайбэй 101 фэнг шүйгийн бэлгэдлийг бүх талаар тооцсон барилга юм. Цамхгийн орох үүдэнд байдаг усан оргилуурын суурийг тус барилгын орцонд орсон чулуу, шил, металлыг оролцуулан хийсэн. Мөн Т хэлбэрийн үүд нь ци буюу барилгаас гарах эерэг энерги гэнэ. Ус нь энэхүү эерэг энергийг эргүүлэн цамхаг руу оруулдаг гэнэ.  Мөн цамхгийн хэлбэр ч ургаж байгаа хулсны хэлбэртэй нь үргэлж өөдөө дээшээ тэмүүлэхийн бэлгэдэл болдог.

Эх сурвалж: http://www.ntn.mn/