Ишлэл:Лондонд өнгөрүүлсэн хоёр жил

Явсан хүнээс ҮГ сонс гэдэгчлэн эрдэмтэй, мэдлэгтэй нэгэн эрхмийн бичвэрийг хуваалцаж байна. Би ч бас хүний нутагт суралцаж байгаагийнх нэг иймэрхүү зүйл тэрлэх цаг ирэх биз ээ. Ойрдоо оюутан хүүхэд цаг зав жаахан тааруу байна. Завгүй байх тусам их зүйл амжуулдаг гэдэг байхаа... Зун цаг айсуй... 

Санал нийлсэн ХЭДЭН үгсээ BOLD болгосон байгаа шүү... Цаг ХЭМНЭЛТ

Лондонд өнгөрүүлсэн хоёр жил

2014 оны 3 сарын 19

Лондонд өнгөрүүлсэн хоёр жилээ дурсан нэгэн нийтлэл бичнэ дээ гэж удаан бодож явлаа. Бороотой, хааяа их гунигтай Английн чийгтэй хүйтэн салхи, нам гүм, хүн цөөтэй гудамж, гэрээсээ хол ганцаараа амьдарч байсан үеийн тэр бүх мэдрэмжийг санагдуулах хөгжмүүдийг хайж олоод сонсох зуураа бичиж эхэллээ...

Үзэсгэлэнт Лондон хотыг хааяа би их санана. Хэдэн км үргэлжлэх ногоон төгөл бүхий парк, орчин үеийн хот хэрнээ хуучны байшингуудаар дүүрэн хөгшин гудамжнууд, хар такси, улаан автобус, хаа сайгүй байх метроны буудлууд, эрх чөлөөтэй эв хавгүй хувцаслалт, өглөө бүр үнэртэх кофены үнэр гээд л Лондонг санагдуулах тэр бүр зүйлс.

 

Ингээд л одоогоос 2, 3 жилийн өмнөхрүү аялж эхэллээ. Англид ихэнхдээ бороо орно, нар гарсан цөөхөн хэдэн хоногт хүмүүс наадам болж байгаа юм шиг парк дээрээ очиж хэвтэцгээнэ. Эргэн тойронд хүмүүс дугуй унаж, гудамжны хөгжимчдийн тоглолт энд тэндгүй сонсогдож хэд гурван зоос цуглуулж байгаа харагдана. 

Лондонгийн өглөө их эрт эхэлнэ. Хүмүүс бүгд гартаа цаасан аягатай кофе барьцгааж ажил хичээлдээ яарцгаана. Тэнд байгаа Монголчуудад завтай өдөр долоо хоногт гол төлөв нэг л байна, үүнээс бусад цагт нь үүрээс шөнө болтол ажиллаж, оюутнууд нь өдрийн цагаар хичээлдээ явж амжина.

 

Дэлхийн хамгийн өртөг өндөртэй хотуудын тоонд ордог энэ хотод нэг паунд хүртэл үнэ цэнэтэй. Гэлээ ч өдөр бүр тасралтгүй төлөвлөгөөтэй ажиллах хүмүүс амралтынхаа нэг өдөр алжаалаа тайлах шиг болж Английн нэрийн хуудас болсон пивоор өөрсдийгөө дайлцгаана. Тэнд пиво их хямд байдаг ба хүмүүс нь “нээрээ л шингэн талх” юмуу гэлтэй ихээр хэрэглэнэ. 

 

Хүний хөдөлмөрийг үнэлэх шиг болдог энэ газар хамаг хүчээрээ хөдөлмөрлөж, амьдралынхаа төлөө зүтгэж чадвал хувь хүнийхээ хувьд ч, санхүүгийн хувьд ч өсөн дэвжих боломжтой.

Ерөнхийдөө ажлууд Монгол хүмүүсийг ажилд авах сонирхол өндөр байдаг ба ази хүмүүс дундаасаа хамгийн хөдөлмөрийн бүтээмж сайтай, ачаалал даах чадвартай, хэлний мэдлэг сайтай гэж үнэлэгддэг. Миний ажигласнаар бол Монголчууд Европ хүмүүсээс ч гэсэн ажиллах чадвар, шинэ ажилд дасан зохицох, заасан зүйлийг хурдан сурах тал дээр үнэхээр илүү байдаг нь бахархалтай санагддаг байлаа.

 

Санхүүгийн хувьд чинээлэг бизнесмен эсвэл шуудхан хэлэхэд гишүүний хүүхэд биш л бол Лондонд оюутнууд дан ганц хичээлдээ анхаарч, ажил хийхгүй, эсвэл их цөөхөн цаг ажиллаад боломжын амьдрах бараг л боломжгүй. Ханшны зөрүү нь Монголоос 2,5 дахин өндөр учир гэр бүлээсээ мөнгө байнга авах нь оюутнуудын сэтгэл зүйд хүртэл хүндээр тусдаг байсан тул хүн бүр дор бүрнээ ажлыг голохгүй хийхийг хичээнэ. 

Эх нутагтаа байхдаа гэрийнхээ аяга шаазангаас өөр зүйлийг угааж арчиж үзээгүй танхилхан охидууд Лондонд очсон эхэн үедээ амьдрахын эрхээр голцуу зочид буудлын цэвэрлэгч хийнэ.

 

Өдөр бүр 10, 20 өрөө цэвэрлэж, хөгшин Англи эмээд загнуулж, хөлсөө дуслуулан гүрийж ажилладаг гэдгийг тэнд нь хамт байж үзээгүй хүмүүс бараг л мэдэхгүй болов уу. Гадагшаа явж сурахыг кинон дээр гардаг шигээр төсөөлж, мөрөөдөлдөө умбан буй хүмүүсийн бодож байснаас хэд дахин хүнд хэцүү нөхцөл байдал хүлээж байдаг гэдгийг ойлгох нь зүйтэй.

Харин тэнд очоод хэсэг хугацааг өнгөрөөж, хэлний чадвар нь дээшлээд, харийн нутагт дасаад ирэхийн цагт голцуу үйлчилгээний газрын ресепшн, зөөгч, бармен, тогооч хийнэ. Энэ үеэс эхлээд амьдралын хэв маяг нь арай илүү амар хялбар болж эхлэдэг ба энэ үед зарим оюутнууд мөнгө хөөж хичээлээ орхигдуулах тохиолдол байдаг бол харин зарим оюутнууд ажил хичээл хоёрыгоо гайхалтай сайхан хослуулж, цагийг хэрхэн үр бүтээлтэй өнгөрүүлж болоход суралцаж эхэлдэг.

 

Нэмж хэлэхэд Англид байсан хүмүүс өөрийн эрхгүй цагийн үнэ цэнийг мэддэг болдог ба нэг минут ч гэсэн хоцрохгүй байхыг үнэн голоосоо хичээдэг болдог нь ирээдүйн амьдралд нь хүртэл их давуу тал болдог юм шиг санагдсан.

 

Долоо хоногийн бараг 4 өдөр нь бороо орж, эсвэл бүдийж өнгөрөх саарал Лондонгийн уур амьсгал гэрээсээ хол байгаа хүмүүсийн сэтгэлийг хааяа их гуниглуулна. Тэр тусмаа нутгаасаа хол олон жил хууль бусаар амьдарч байгаа хүмүүс интернетээр Монгол дуу сонсох төдийд нулимс нь гарч, эх орон, ээж аав, үр хүүхдээ үнэн голоосоо санаж үгүйлнэ.

 

Тэгээд л тэднийхээ төлөө хатуу бүхнийг тэвчин үүрээс шөнө болтол хөдөлмөрлөдөг гэдгийг эх орондоо байгаа тэдний гэр бүлийнхэн нь мэдэж байвал зүйтэй. Нутаг буцахыг хүсэвч Монголоос багахан хэмжээгээр илүү өгдөг цалинд нь болон тэндээ олон арван жилийг хайртай хүмүүсээсээ хол өнгөрүүлж байгаа хүмүүсийг харж, өрөвдөх сэтгэл төрдөг байсныг энд бичмээр санагдлаа.

Дэлхийн том хотуудад байдаг сайн муу бүхэн тэнд байгаа. Хүний нутагт биеэ хичээж явахгүй л бол биднийг зорьсон замаас нь хазайлгаж, амьдралыг маань сүйрүүлэх зүйлүүд ч гэсэн булан тойрох төдийд байдаг. Тэнд очсон хойноо хар тамхинд орчихоод, сургуулиа хаячихсан байж гэрийнхэндээ хэлж чадахгүй яваа охин байхад, “халтарууд” гэж хочилдог хар, бор арьстнуудад биеэ үнэлэдэг болчихсон хүүхнүүд ч гэсэн байдаг байсныг нуух юун...

 

Жил бүр ээж аав, хайртай хүмүүсийнхээ итгэл найдвар нь болсон олон олон оюутнууд суралцах хугацаагаа дуусган эх нутгынхаа зүг ихийг хийж бүтээх эрмэлзэлтэйгээр буцаж байна.  Хөгшин Англи орон бидэнд юунд ч үл шантрах сэтгэл, амьдралынхаа төлөө гараа атгаад зүтгэх хатуужил, хүсэл тэмүүлэл, хэний ч өмнө нүүр бардам боловсролыг өгч, эх орон, эцэг эх, цаг хугацааны үнэ цэнийг мэдрүүлсэн юм шүү.

Төгсгөлд нь Их Британи улс бол та бидний сайн мэдэх гоо үзэсгэлэн төгс, харж үзэх, аялаж зугаалах, суралцах, туршлага хуримтлуулах, бас судалж мэдэх зүйлээр арвин баян улс билээ.

 

Энэ улсад хоёр жилийн хугацаанд суралцаж төгссөн хүний хувьд нийт уншигчид та бүхэндээ захиж хэлэхэд амьдралынхаа хугацаандаа заавал Англи улсад очиж үзээрэй гэж зөвлье. Эцэст нь танд зориулж өөрийн авсан гэрэл зургийн цуглуулгыг хүргэж байна. Таны найз Монголжингоо. 

 Сурвалж: http://www.mongoljingoo.mn/

Гэрэл зураг: https://www.facebook.com/KKLphotography